“Do të vij tani tek shtëpia dhe do të vras ty edhe mamanë tënde. Nuk dua t’ia di për burg dhe nuk e kam problem të bëj përsëri. Kam tre vëllezër do to të bëjnë keq ty dhe mamasë tënde. Nuk ke zgjidhje, o të marr ty, o s’ka zgjidhje tjetër”.
Gjykata e Tiranës ka dënuar me 5 vite burg një shpërndarës picash në kryeqytet, por për shkak të gjykimit të shkurtuar ai do të vuajë vetëm 3 vjet e 8 muaj burg.
27-vjeçari, Klauden Muçogllava ishte kthyer në makth për një vajzë 17-vjeçareje, të cilën e kishte njohur pasi i kishte dërguar disa pica në shtëpi.
Ai ka kërkuar me ngulm krijimin e një lidhjeje dashurie. Për këtë kërkesë 27-vjeçari i ka dalë vajzës me iniciale M. G. çdo ditë përpara në rrugë duke i thënë: “po s’u bëre e imja, unë të vras”.
Historia nisi që në vitin 2017. I riu u arrestua nga policia në shtator të 2017. Në momentin e arrestimit Klauden Muçogllava ka goditur me levë një prej efektivëve të një patrulle policie.
“Arrestimi i këtij shtetasi është kryer pasi prej dy javësh ka përndjekur në mënyrë të vazhdueshme shtetasen e mitur G.M., 16 vjeçe dhe gjatë përballjes me policinë në banesën e kësaj shtetaseje ka kundërshtuar dhe goditur me mjete të forta punonjësin e policisë, shtetasin A.T., 25 vjeç, banues në Tiranë”, sqaronte policia në një njoftim për mediat në 29 shtator të vitit 2017.
Në momentin e arrestimin Muçogllavës iu gjetën dhe 29 gramë kanabis. I riu nuk ka qenë një emër i panjohur për policinë.
Në vitin 2014, në atë kohë 23 vjeç ai është ndaluar po për të njëjtën arsye. Megjithëse kishte kohë që ishte ndarë nga e dashura e tij A. G. Dhe në vitin 2013 ishte dënuar me gjobë nga Gjykata ai vazhdonte nga përndiqte.
Vendimi i dënimit në vitin 2013
Në datën 27.2.2013, rreth orës 22:00, Klauden Muçogllava ka shkuar tek banesa e shtetases G. G., e cila është mamaja e të dëmtuarës A. G. I pandehuri ka tentuar të hyjë me forcë në banesë, me qëllim për të takuar shtetasen A. G., me të cilën ka qenë i fejuar prej dy vjetësh. Pas refuzimit të kallëzueses i pandehuri, i nxehur ka goditur xhamat e dyqanit të shtetases G. G., i cili ndodhet ngjitur me banesën dhe si rezultat janë dëmtuar dhe thyer pesë xhama të këtij objekti. Gjithashtu, shtetasja A. G. ka paraqitur ankim me procesverbalin e datës 2.4.2013 se është shqetësuar në mënyrë të vazhdueshme në numrin e saj celular dhe nga tre sms shqetësuese në orët e vona të natës nga i pandehuri Klauden Muçogllava. Është bërë këqyrja e telefonit të ankueses A. G., ku ka rezultuar tre sms shqetësuese të marra në orë të vona, pas ngjarjes së datës 27.2.2013, nga numri telefonik që dispononte i pandehuri Klauden Muçogllava. Është pyetur si deklarues në prokurori ky shtetas në lidhje me posedimin dhe përdorimin e këtij numri celular. I pandehuri Klauden Muçogllava ka pranuar edhe vetë në deklarimin e tij të datës 28.4.2013 se është ai që ka telefonuar në mënyrë të vazhdueshme nga celulari i tij të dëmtuarën A. G., por se telefonatat ai i ka bërë në gjendje të dehur dhe ndjehet shumë i penduar.